म्याग्दी, फागुन-४, फागुन २१ गते हुने प्रतिनिधि सभा सदस्य पदको निर्वाचनलाई लक्षित गर्दै नेपाल कम्युनिष्ट पार्टी माओवादीका उम्मेदवार ध्रुव घिमिरेले म्याग्दीको मंगला गाउँपालिकाका विभिन्न वडामा मतदाता भेटघाट कार्यक्रमलाई तीव्रता दिएका छन्।
मंगला गाउँपालिका–खर्क, आर्बाङ र दुर्दी क्षेत्रमा आयोजित घरदैलो तथा अन्तरक्रिया कार्यक्रममा स्थानीय मतदातासँग प्रत्यक्ष भेट गर्दै उम्मेदवार घिमिरेले आफ्ना एजेण्डा प्रस्तुत गरेका हुन्।
घिमिरे (क्षेत्रबहादुर घिमिरे ‘ध्रुव’) लाई पार्टीभित्र प्रभावशाली युवा नेताका रूपमा चिनिन्छ। स्पष्ट विचार, संगठनात्मक अनुभव र स्थानीय मुद्दाप्रति दृढ अडानका कारण उनी युवापुस्तामाझ लोकप्रिय रहेको स्थानीय कार्यकर्ताहरूले बताएका छन्।
यस निर्वाचनमार्फत नेकपा माओवादी पहिलो पटक संसदीय अभ्यासमा औपचारिक रूपमा सहभागी हुन लागेको सन्दर्भमा उक्त क्षेत्रलाई पार्टीको बलियो र प्रभावशाली आधार क्षेत्रका रूपमा हेरिएको छ। मंगला गाउँपालिकाका विभिन्न वस्तीमा भएको भेटघाटका क्रममा मतदाताहरूले विकास, रोजगारी, शिक्षा, स्वास्थ्य तथा पूर्वाधार विस्तारका विषय उठान गरेका थिए।
उम्मेदवार घिमिरेले आफू निर्वाचित भए जनताका आधारभूत आवश्यकता सम्बोधन गर्दै सुशासन, पारदर्शिता र समावेशी विकासलाई प्राथमिकतामा राख्ने प्रतिबद्धता व्यक्त गरेका छन्।
स्थानीयस्तरमा पार्टी संगठन मजबुत रहेको दाबी गर्दै माओवादी कार्यकर्ताहरूले यसपटक सकारात्मक परिणाम आउने विश्वास व्यक्त गरेका छन्। निर्वाचन नजिकिँदै जाँदा मंगला गाउँपालिकाका विभिन्न क्षेत्रमा चुनावी गतिविधि थप सक्रिय बन्दै गइरहेको छ।
