बेनी, फागुन-४, नेकपा एमाले म्याग्दीका उम्मेदवार हरिकृष्ण श्रेष्ठलाई बेनी नगरपालिका–३ भकिम्लीका मतदाताले स्वागत गरेका छन्। चुनावी प्रचार–प्रसार अन्तर्गत घरदैलो कार्यक्रम लिएर भकिम्ली पुगेका श्रेष्ठलाई स्थानीयले आत्मीयतापूर्वक स्वागत गर्दै शुभकामना व्यक्त गरेका हुन्।
श्रेष्ठले बेनी नगरका विभिन्न वस्तीहरूमा मतदाता भेटघाट कार्यक्रमलाई तीव्रता दिएका छन्। घरदैलो अभियानका क्रममा उहाँले स्थानीय बासिन्दासँग प्रत्यक्ष संवाद गर्दै विकास, सुशासन र जनअपेक्षाका विषयमा धारणा आदान–प्रदान गरिरहेका छन्।
भेटघाटका क्रममा स्थानीयले क्षेत्रको सडक, खानेपानी, शिक्षा, स्वास्थ्य लगायतका आधारभूत आवश्यकता र पूर्वाधार विकासका विषयमा आफ्ना मागहरू प्रस्तुत गरेका थिए। उम्मेदवार श्रेष्ठले जनताका समस्यालाई प्राथमिकतामा राखेर समाधानका लागि प्रतिबद्ध रहने विश्वास दिलाउनुभएको थियो।
भकिम्लीमा प्राप्त जनसमर्थनप्रति उत्साहित हुँदै श्रेष्ठले म्याग्दीबाट प्रतिनिधित्व गर्ने विषयमा आफू विश्वस्त रहेको प्रतिक्रिया दिनुभयो। “जनताको अपार साथ र समर्थनले मलाई थप जिम्मेवार बनाएको छ। म्याग्दीको समग्र विकास र समृद्धिका लागि निरन्तर लागिपर्नेछु,” उहाँले भन्नुभयो।
चुनाव नजिकिँदै जाँदा म्याग्दीमा उम्मेदवारहरूको घरदैलो र मतदाता भेटघाट कार्यक्रम तीव्र बन्दै गएको छ।
