बेनी, फागुन-१, म्याग्दीको बेनीस्थित न्यु वेष्ट पोइन्ट आवासीय माध्यमिक विद्यालयमा कक्षा ११/१२ स्तरिय छात्र बास्केटबल प्रतियोगिता सम्पन्न भएको छ। विद्यालयको वार्षिक शैक्षिक क्यालेन्डर अनुसार मंगलबारदेखि सुरु भएको प्रतियोगिता बिहीबार सम्पन्न भएको हो।
प्रतियोगितामा कक्षा ११ र १२ का गरी ६ वटा टोलीको सहभागिता रहेको थियो। फाइनल खेलमा कक्षा १२ फाइनान्स समूहका दुई टोलीबीच प्रतिस्पर्धा भएको थियो। निकै प्रतिस्पर्धात्मक खेलमा १२ फाइनान्स ‘A’ समूह, जसको नेतृत्व विदान भण्डारीले गरेका थिए, विजेता बन्न सफल भएको छ। जेम्स पुनको समूह फाइनान्स B उपविजेता बनेको छ।
विजेता तथा उपविजेता टोलीलाई आइतबार आयोजित विशेष समारोहका बीच पदक तथा प्रमाणपत्र प्रदान गरिने विद्यालयले जनाएको छ।
प्रतियोगिताको उद्घाटन समारोहमा विद्यालयका प्रिन्सिपल डि.वि. दाहालले खेल शिक्षक दिपेन राईलाई बल र सिटी हस्तान्तरण गर्दै प्रतियोगिताको औपचारिक शुभारम्भ गर्नुभएको थियो।
यस्ता खेलकुद कार्यक्रमले विद्यार्थीहरूको प्रतिभा प्रस्फुटन गर्नुका साथै जिल्ला स्तरिय प्रतियोगितामा सहभागी हुने अवसर सिर्जना गर्ने विश्वास विद्यालयले व्यक्त गरेको छ।
