दीक्षित घर्ति क्षेत्री/म्याग्दी, माघ-२५, म्याग्दी जिल्लाका सबै नौ सय २३ जना किशोरीलाई पाठेघरको मुखको क्यान्सरविरुद्धको ह्युमन पापिलोमा भाइरस, अर्थात् एचपीभी खोप लगाइने भएको छ।
जनस्वास्थ्य कार्यालय म्याग्दीका अनुसार जिल्लाका ४८ वटै वडामा रहेका एक सय ५८ वटा विद्यालयका कक्षा ६ मा अध्ययनरत छात्रा तथा विद्यालय नजाने १० वर्ष उमेर समूहका किशोरीलाई लक्षित गरी खोप अभियान सञ्चालन गर्न लागिएको हो।
यो खोप अभियान यही माघ २७ गतेदेखि फागुन ४ गतेसम्म सञ्चालन हुनेछ। खोप पूर्ण रूपमा सुरक्षित रहेको चिकित्सकहरूले बताएका छन्। जनस्वास्थ्य कार्यालय म्याग्दीका प्रमुख भुवन ठकुराठीले खोपप्रति ढुक्क भई सहभागिता जनाउन आग्रह गर्नुभएको छ।
उहाँका अनुसार जिल्लामा रहेका निजी तथा सामुदायिक विद्यालयमा अध्ययनरत किशोरीका लागि सम्बन्धित विद्यालयमै खोप केन्द्र स्थापना गरिनेछ। साथै, गत वर्ष खोप लगाउन छुटेका कक्षा ९ र १० मा अध्ययनरत किशोरी तथा विद्यालय नजाने ११ देखि १४ वर्ष उमेर समूहका किशोरीलाई पनि यस अभियानमा समेट्ने रणनीति बनाइएको छ।
कार्यतालिका अनुसार बेनी नगरपालिका र अन्नपूर्ण गाउँपालिकामा माघ २७ गते, मंगला, मालिका र धवलागिरी गाउँपालिकामा माघ २८ गते तथा रघुगंगा गाउँपालिकामा फागुन ४ र ५ गते खोप अभियान सञ्चालन गरिनेछ। बेनी नगरपालिकामा ३३४ जना,मंगलामा ११२,मालिकामा १७८,धवलागिरिमा १४१, रघुगङ्गामा ९१ र अन्नपूर्ण गाउँपालिकामा ६७ जना किशोरीहरुलाई एचपीभी खोप लगाइने स्वास्थ्य कार्यालयले जनाएको छ । त्यस्तै, विद्यालय नजाने २० वर्ष उमेर समूहका किशोरी तथा गत वर्ष छुटेका चार जनालाई समेत खोप लगाउने लक्ष्य लिइएको छ। अभियान सफल बनाउन एक सय सात जना स्वास्थ्यकर्मी र एक सय सात जना स्वयंसेवक परिचालन गरिने सूचना अधिकारी गणेश सुबेदीले जानकारी दिनुभएको छ।
