बेनी, माघ-१४,
नेपाली कांग्रेस म्याग्दीका प्रतिनिधिसभा सदस्य उम्मेदवार कर्णबहादुर भण्डारीले जिल्लाको जलविद्युत् र पर्यटन क्षेत्रबाट हुने आम्दानी म्याग्देली जनतासँग प्रत्यक्ष जोड्ने प्रतिबद्धता व्यक्त गर्नुभएको छ।
निर्वाचन परिचालन समितिले आयोजना गरेको पत्रकार सम्मेलनमा उम्मेदवार भण्डारीले जलविद्युत् आयोजनाबाट प्रभावित क्षेत्रका बासिन्दालाई प्राथमिकता दिँदै जिल्लाभर लाभ पुग्ने योजना अघि बढाइने बताउनुभयो।
उहाँले जलविद्युत्, पर्यटन, कृषि, शिक्षा, स्वास्थ्य र यातायातजस्ता आधारभूत सेवामा भइरहेका कामलाई अझ प्रभावकारी बनाइने जानकारी दिनुभयो।
उम्मेदवार भण्डारीका अनुसार म्याग्दीमा लगानीमैत्री वातावरण निर्माण गरी विदेशिएका युवालाई स्वदेशमै रोजगारी दिने लक्ष्य लिइएको छ।
उहाँले भन्नुभयो,
“म्याग्दी सम्भावनायुक्त जिल्ला हो। जनताको आवश्यकता अनुसार योजना बनाएर काम गर्नेछु।”
जिल्लामा कुल ८६ हजार ३९७ मतदाता रहेका छन्।
जसमध्ये ४२ हजार ३३२ पुरुष, ४४ हजार ६४ महिला र एक जना यौनिक अल्पसंख्यक समुदायका मतदाता छन्।
यसैगरी, म्याग्दीमा ८२ मतदानस्थल र ११० मतदान केन्द्र कायम गरिएको छ।
सुरक्षाका दृष्टिले १५ मतदानस्थल अतिसंवेदनशील, ५८ संवेदनशील र ८ वटा सामान्य वर्गमा राखिएको छ।
प्रतिनिधिसभा सदस्य निर्वाचन आगामी फागुन २१ गते हुने छ।
