जलजला, माघ-१४, पर्वतको जलजला गाउँपालिकामा सञ्चालित वृद्धिमुखी उद्यमशीलता तथा रोजगारी प्रवर्द्धन कार्यक्रम अन्तर्गत उत्कृष्ट १० जना उद्यमीलाई सम्मान गरिएको छ। गण्डकी प्रदेश सरकारको उद्योग तथा पर्यटन मन्त्रालय, जलजला गाउँपालिका र दायित्व संस्थाको सहकार्यमा सञ्चालन भएको यस कार्यक्रमले स्थानीय तहमा उद्यमशीलता विकास र रोजगारी सिर्जनामा सकारात्मक संकेत दिएको छ।
जलजलाका नौ वडाबाट १५४ जना उद्यमीले आवेदन दिएकोमा चरणबद्ध मूल्याङ्कन प्रक्रियाबाट पहिलो चरणमा ४० जना छनौट गरी उनीहरुलाई तालिम दिइएको थियो। तालिमपछि व्यावसायिक योजना तयार गराई दोस्रो चरणमा २० जना उत्कृष्ट उद्यमी छनौट गरियो। तीमध्ये स्थलगत अनुगमनको ७५ प्रतिशत र एसएमएस भोटिङको २५ प्रतिशत आधारमा उत्कृष्ट १० उद्यमी घोषणा गरिएको कार्यक्रमका प्रदेश संयोजक जुनतारा बुढामगरले जानकारी दिनुभयो।
उत्कृष्ट १० उद्यमीलाई प्रविधि खरिदका लागि जनही १ लाख रुपैयाँ नगद सहयोग प्रदान गरिएको छ। यसले कृषि, पशुपालन र लघुउद्यम क्षेत्रमा आधुनिक प्रविधिको प्रयोग बढाउने र उत्पादन क्षमता विस्तार गर्ने अपेक्षा गरिएको छ। यसअघि गत आर्थिक वर्ष २०८१/०८२ मा उत्कृष्ट २० मा छनौट भएका उद्यमीलाई न्यूनतम २५ हजारदेखि ५० हजार रुपैयाँसम्मको अनुदान उपलब्ध गराइसकिएको छ भने यस वर्ष उत्कृष्ट २० बाहिर परेका २० जना उद्यमीलाई पनि प्रविधि खरिदका लागि २० हजार रुपैयाँ बराबरको पुरक अनुदान दिने व्यवस्था गरिएको छ।
कार्यक्रममा उद्योग तथा पर्यटन मन्त्री मित्रलाल बस्यालले जलजला गाउँपालिका तरकारी, फलफूल, पशुपालन र लघुउद्यमका दृष्टिले सम्भावनायुक्त क्षेत्र भएको उल्लेख गर्दै कार्यक्रमको प्रभावकारिताका आधारमा यसलाई प्रदेशका अन्य पालिकामा समेत विस्तार गरिने बताउनुभयो। गाउँपालिकाका अध्यक्ष राजुप्रसाद आचार्यले उत्कृष्ट १० उद्यमीमध्ये एक जनालाई “सर्वोत्कृष्ट उद्यमी” घोषणा गरी उद्यम विस्तारका लागि थप १ लाख ५० हजार रुपैयाँ अनुदान उपलब्ध गराइने जानकारी दिनुभयो।
सम्मानित उद्यमी जमुना आचार्य र कमला बानियाँ थापाले सम्मानले थप उत्साह र जिम्मेवारी बढाएको प्रतिक्रिया दिनुभएको छ। कार्यक्रममा सहभागी उद्यमीहरुले तालिम, योजना निर्माण र प्रविधि सहयोगले आफ्नो व्यवसायलाई व्यवस्थित गर्न सहयोग पुगेको बताएका छन्।
प्रदेश सरकारको ४० लाख, जलजला गाउँपालिकाको २० लाख र दायित्व संस्थाको १५ लाख बजेटबाट सञ्चालित यस कार्यक्रमले पालिकामा उद्यम प्रवर्द्धन र रोजगारी सिर्जनामा टेवा पुर्याउने अपेक्षा गरिएको छ। तर दीर्घकालीन रूपमा यस कार्यक्रमलाई सफल बनाउन अनुदानसँगै बजार पहुँच, उत्पादनको बजारीकरण, ब्रान्डिङ र निजी क्षेत्रसँगको सहकार्यलाई सुदृढ बनाउन आवश्यक देखिन्छ।
उद्यमशीलता प्रवर्द्धनलाई सम्मान र आर्थिक सहयोगमा मात्र सीमित नराखी दिगो उत्पादन र बजार व्यवस्थापनसँग जोड्न सकिएमा जलजला गाउँपालिका ग्रामीण अर्थतन्त्र सुदृढीकरणको नमुना पालिका बन्ने अपेक्षा गरिएको छ।
