जलजला, माघ-८, पर्वतको जलजला गाउँपालिकाको आयोजनामा बुधबार लामाखेतमा बालमैत्री स्थानीय शासनको अवधारणासम्बन्धी अभिमुखीकरण कार्यक्रम सम्पन्न भएको छ।
‘समतामूलक समाज जलजलाको सार : कृषि, शिक्षा, स्वास्थ्य, पर्यटन र पूर्वाधार’ भन्ने मूल नारासहित आयोजित कार्यक्रममा गाउँपालिका स्तरका जनप्रतिनिधि, कर्मचारी तथा विभिन्न सरोकारवालाहरूको सहभागिता रहेको थियो।
कार्यक्रममा बालमैत्री स्थानीय शासनको अवधारणा, यसका ५१ वटा सूचक, सम्बन्धित समितिहरू, तिनका काम–कर्तव्य तथा अधिकारका विषयमा बृहत् अभिमुखीकरण गरिएको गाउँपालिकाले जनाएको छ। साथै बालमैत्री स्थानीय शासन कार्यक्रम कार्यान्वयन तालिकालगायत विषयमा समेत सहजीकरण गरिएको थियो।
अभिमुखीकरण कार्यक्रमका मुख्य प्रशिक्षक बागलुङ नगरपालिकाका नगर शिक्षा अधिकृत धनप्रसाद पोखरेल रहनुभएको थियो। कार्यक्रममा सहभागीहरूबीच अन्तरक्रिया तथा छलफल पनि गरिएको थियो।
सोही अवसरमा जलजला गाउँपालिकालाई बालमैत्री स्थानीय शासन घोषणा गर्ने प्रतिबद्धता व्यक्त गर्दै सहभागीहरूले व्यानरमा हस्ताक्षर गरेका छन्। जनप्रतिनिधि, कर्मचारी तथा कार्यक्रमका सहभागीहरूले सामूहिक रूपमा प्रतिबद्धता जनाएका हुन्।
कार्यक्रम जलजला गाउँपालिकाका अध्यक्ष राजुप्रसाद आचार्यको अध्यक्षतामा सम्पन्न भएको थियो। कार्यक्रममा उपाध्यक्ष दिपक आचार्यले स्वागत मन्तव्य राख्नुभएको थियो भने बालमैत्री स्थानीय शासन सम्पर्क व्यक्ति भेषनाथ आचार्यले कार्यक्रम सञ्चालन गर्नुभएको थियो। कार्यक्रममा प्रमुख प्रशासकीय अधिकृत खगराज गौतमको विशेष उपस्थिति रहेको थियो।
