बेनी, माघ-४, म्याग्दी सदरमुकाम बेनीमा सम्पन्न जिल्ला स्तरीय छात्र–छात्रा भलिबल प्रतियोगिताको उपाधि छात्रतर्फ राष्ट्रिय मावि रुम र छात्रातर्फ आयोजक बेनी सामुदायिक माध्यमिक विद्यालयले जितेका छन् । आइतबार सम्पन्न ‘प्रथम बिसिएसएस कप’ अन्तर्गत छात्रतर्फको फाइनलमा मालिका गाउँपालिका–२ रुमको राष्ट्रिय माविले न्यू वेष्ट पोइन्ट आवासीय माविलाई सोझो तीन सेटमा पराजित गर्दै उपाधि हात पारेको हो । छात्रतर्फ प्रतियोगितामा १६ विद्यालयको सहभागिता रहेको थियो ।
त्यसैगरी छात्रातर्फ आयोजक बेनी सामुदायिक माविले प्रकाश मावि बेनीलाई लगातार तीन सेटमा पराजित गर्दै उपाधि जितेको छ । छात्रातर्फ ८ विद्यालयले प्रतिस्पर्धा गरेका थिए । दुवै विधाका विजेता र उपविजेतालाई क्रमशः ६० हजार र ४० हजार नगदसहित ट्रफी, मेडल र प्रमाणपत्र प्रदान गरिएको विद्यालयका प्रधानाध्यापक भीम घर्ती मगरले जानकारी दिनुभयो । जिल्लामा प्रायः छात्रभन्दा छात्रातर्फको पुरस्कार राशि कम हुने परम्परालाई तोड्दै बेनी सामुदायिक माविले समान पुरस्कारको अभ्यास सुरु गरेको उहाँले बताउनुभयो ।
प्रतियोगितामा छात्रतर्फ उत्कृष्ट सेटरमा राष्ट्रिय माविका छकबहादुर पुन, स्पाइकर योजन पुन, प्रशिक्षक युगेश पुन र उत्कृष्ट खेलाडी भिमबहादुर विक घोषित भए । त्यसैगरी छात्रातर्फ उत्कृष्ट खेलाडी बेनी सामुदायिककी क्याप्टेन समीक्षा थापा, सेटर अस्मिता पुन, स्पाइकर प्रकाश माविकी प्रिया पुन र प्रशिक्षक प्रविण श्रेष्ठ उत्कृष्ट ठहरिएका छन् ।
विजेता खेलाडीलाई गण्डकी प्रदेश सभा सदस्य रेशम जुग्जाली, विद्यालय व्यवस्थापन समितिका अध्यक्ष रमेशकुमार श्रेष्ठलगायतले पुरस्कार वितरण गर्नुभयो । सोही अवसरमा बेनी सामुदायिक माविले गरिब, विपन्न तथा जेहेन्दार विद्यार्थीको सहयोगका लागि २० लाख रुपैयाँको अक्षय कोष स्थापना गरेको घोषणा गरेको छ । हालसम्म कोषमा ७० हजार रुपैयाँ संकलन भइसकेको र यसमार्फत आर्थिक अवस्था कमजोर भएका विद्यार्थीको पठनपाठनमा सहयोग पुर्याइने प्रधानाध्यापक घर्तीले बताउनुभयो ।
विद्यालयले शिक्षासँगै खेलकुद र अतिरिक्त क्रियाकलापलाई समान प्राथमिकता दिने उद्देश्यले जिल्लास्तरीय भलिबल प्रतियोगिताको आयोजना गरेको जनाएको छ ।
