बेनी, माघ-२,
भूकम्पीय जोखिम उच्च रहेको म्याग्दीमा भूकम्पबाट सधैं सतर्क रहनुपर्नेमा जोड दिइएको छ।
२८ औँ राष्ट्रिय भूकम्प सुरक्षा दिवसका अवसरमा सदरमुकाम बेनीमा आयोजित भूकम्पसम्बन्धी सचेतनामूलक कार्यक्रममा सहभागी वक्ताहरूले भूकम्पीय जोखिम न्यूनीकरणका लागि भूकम्पप्रतिरोधी संरचना निर्माण र नागरिक सचेतना अत्यावश्यक रहेको बताएका छन्।
कार्यक्रममा जिल्ला समन्वय समिति म्याग्दीकी कार्याबाहक प्रमुख दिलकुमारी खत्री, बेनी नगरपालिकाका मेयर सुरत केसी, प्रमुख जिल्ला अधिकारी रविन्द्र आचार्य, जिल्लास्थित सुरक्षा निकायका प्रमुख, साथै सरकारी तथा गैरसरकारी संस्थाका प्रतिनिधिहरूको सहभागिता रहेको थियो।
कार्यक्रममा विगतका भूकम्पबाट पाठ सिक्दै सुरक्षित संरचना निर्माणका लागि पूर्वतयारी र आवश्यक सचेतना अभिवृद्धिमा तीनै तहका सरकार मातहतका निकायबीच समन्वय गर्ने प्रतिबद्धता व्यक्त गरिएको छ।
वि.सं. १९९० साल माघ २ गते गएको विनाशकारी भूकम्पको सम्झनामा २०५५ सालदेखि हरेक वर्ष राष्ट्रिय भूकम्प सुरक्षा दिवस मनाइँदै आइएको छ।
मापन केन्द्रको तथ्याङ्कअनुसार पछिल्ला दुई दशकयता पश्चिम म्याग्दी र छिमेकी जिल्ला बागलुङमा ४ देखि ५ रेक्टर स्केलका भूकम्प २५ भन्दा बढी पटक महसुस भइसकेका छन्।
मुस्ताङ र पर्वतको तुलनामा म्याग्दी र बागलुङमा भूकम्पका केन्द्रविन्दु बढी रहेको जनाइएको छ। पछिल्ला दुई दशकमा धौलागिरि अञ्चलमा गएको सबैभन्दा ठूलो भूकम्प बागलुङको बोवाङलाई केन्द्रविन्दु बनाएर गएको ४ दशमलव ९ रेक्टर स्केलको भूकम्प रहेको थियो।
भूगर्भविद्हरूका अनुसार धौलागिरि हिमालको फेद हुँदै सक्रिय ‘नर्मल फल्ट’ रहेको र सक्रिय फल्ट भएको क्षेत्रमा भूकम्पको जोखिम उच्च हुने तथ्य जियोलोजिकल अध्ययनहरूले पुष्टि गरिसकेको छ।
यसै कारण भूकम्पीय जोखिमबाट जोगिन समयमै सुरक्षित संरचना निर्माण र निरन्तर सचेतना आवश्यक रहेको सरोकारवालाहरूले बताएका छन्।
