बेनी, पुष-३०, म्याग्दीको सदरमुकाम बेनीमा पुष ३० गतेदेखि ११औँ संस्करणको माघेसङ्क्रान्ति मेला, खाना महोत्सव तथा कृषि प्रदर्शनी–२०८२ सुरु भएको छ।
‘उद्योग, व्यापार र कलाको विकास गरौँ, संस्कृतिको संरक्षण गर्दै पर्यटन प्रवर्द्धन गरौँ’ भन्ने मूल नारासहित म्याग्दी उद्योग वाणिज्य संघ तथा महिला उद्यम विकास समिति म्याग्दीको संयुक्त आयोजनामा मेला सञ्चालन गरिएको हो।
परम्परागत रूपमा लाग्दै आएको माघेसङ्क्रान्ति मेलाको जगेर्ना र निरन्तरता, स्थानीय खानाको प्रचार–प्रसार, कला, संस्कृति र भेषभूषाको प्रदर्शन, स्थानीय प्रतिभाको पहिचान तथा सुस्ताउँदै गएको आर्थिक गतिविधिलाई चलायमान बनाउने उद्देश्यले मेला आयोजना गरिएको आयोजकले जनाएको छ। मेलाको अवसरमा म्याग्दीका ग्रामीण भेगका किसानहरूले उत्पादन गरेका विभिन्न कृषिजन्य उपजहरूको प्रदर्शनीसमेत सुरु गरिएको छ।
मेलाको उद्घाटन समारोहमा नेपाल उद्योग वाणिज्य महासंघका केन्द्रीय अध्यक्ष चन्द्रप्रसाद ढकालले निजी क्षेत्रलाई लगानीमैत्री र सुरक्षित वातावरण आवश्यक रहेको बताउनुभयो। उहाँले देशमा हुने विभिन्न आन्दोलनका कारण निजी क्षेत्रले ठूलो क्षति बेहोर्नुपरेको उल्लेख गर्दै निजी क्षेत्रलाई निषेधित क्षेत्र घोषणा गरी राज्यले सुरक्षाको प्रत्याभूति दिनुपर्नेमा जोड दिनुभयो।
अध्यक्ष ढकालका अनुसार निजी क्षेत्रले देशमा ८६ प्रतिशतभन्दा बढी रोजगारी सिर्जना गरेको छ भने ५० प्रतिशतभन्दा बढी राजस्वमा योगदान पु¥याएको छ। उहाँले नेपालमा उपलब्ध प्राकृतिक स्रोतसाधन र आन्तरिक पूँजीको परिचालनमार्फत स्वदेशमै पर्याप्त रोजगारी सिर्जना गर्न सकिने धारणा राख्नुभयो। साथै, निजी क्षेत्रको लगानीमा निर्माण हुने आयोजनाहरूमा राज्यले सुरक्षा र भरपर्दो वातावरण निर्माण गर्नुपर्नेमा उहाँले जोड दिनुभयो।
आउँदो माघ ३ गतेसम्म सञ्चालन हुने मेलामा स्थानीय उत्पादनहरूको निःशुल्क प्रदर्शनीको व्यवस्था गरिएको छ। मेलाभित्र कृषि तथा औद्योगिक उत्पादनको प्रदर्शनी, विद्यालयस्तरीय चित्रकला प्रतियोगिता, लोकनृत्यसहितका झाँकी, कलाकारहरूको सांस्कृतिक प्रस्तुति तथा उद्यमीहरूबीच टोपी, दुनाटपरी र बाँसबाट धुप बनाउने प्रतिस्पर्धाजस्ता आकर्षक कार्यक्रमहरू समावेश गरिएको मूल संयोजक तथा महिला उद्यम विकास समितिकी सभापति अम्बिका श्रेष्ठले जानकारी दिनुभयो।
कार्यक्रम सुरु हुनुअघि विभिन्न संघ–संस्था, विद्यालय तथा जातजातिको सहभागितामा झाँकीसहितको र्याली बजार परिक्रमा गर्दै खुला मञ्चमा पुगेर उद्घाटन समारोह सम्पन्न गरिएको थियो।
