बेनी- पुष-२९, माघे सङ्क्रान्ति पर्व नजिकिँदै गर्दा बेनी बजारमा उत्साह बढेको छ। यही अवसरमा आयोजना हुन लागेको खाना महोत्सव तथा कृषि मेला प्रदर्शनीको तयारी पूरा भएको आयोजकले जनाएको छ।
म्याग्दी उद्योग वाणिज्य संघ अन्तर्गतको महिला उद्योग विकास समितिको आयोजनामा यही पुष ३० गतेदेखि माघ ३ गतेसम्म ११ औँ माघे सङ्क्रान्ति मेला, खाना महोत्सव तथा कृषि मेला प्रदर्शनी सञ्चालन हुँदैछ।
परम्परागत रूपमा लाग्दै आएको माघे सङ्क्रान्ति मेलालाई नयाँ आयाम दिन स्थानीय खाना, कला र संस्कृतिको संरक्षण तथा प्रवर्द्धन, आन्तरिक तथा बाह्य पर्यटक आकर्षण र जिल्लाको आर्थिक गतिविधि चलायमान बनाउने उद्देश्यले महोत्सव आयोजना गरिएको समितिकी सभापति अर्चना श्रेष्ठले जानकारी दिनुभयो।
महोत्सव स्थलमा स्थानीय उद्यमी, कृषक तथा औद्योगिक उत्पादनका ५० वटा स्टल रहनेछन्। मेलामा खाना, पिङ, लोकनृत्य, कृषि तथा पशुपन्छी प्रदर्शनी, परम्परागत खेल, झाँकी र कलाकारहरूको प्रस्तुति रहनेछ।
त्यसैगरी महिला उद्यमीहरूका लागि बच्चाको टोपी, ढाका चुरा र बाक्लो धूप बनाउने प्रतियोगिता आयोजना गरिएको छ। कृषि विकास कार्यालयले फलफूल, तरकारी र खाद्यान्नको प्रदर्शनी गर्नेछ भने भेटेरिनरी अस्पताल तथा पशु सेवा केन्द्रले पशुपन्छी प्रदर्शनी गर्नेछन्।
महोत्सवमा स्थानीय उत्पादनको निःशुल्क प्रदर्शनीको व्यवस्था गरिएको म्याग्दी उद्योग वाणिज्य संघका अध्यक्ष सुबिन श्रेष्ठले बताउनुभयो। महोत्सवको उद्घाटन नेपाल उद्योग वाणिज्य महासंघका अध्यक्ष चन्द्रप्रसाद ढकालले गर्ने कार्यक्रम छ। उद्घाटनअघि बेनी बजारमा झाँकीसहित र्याली निकालिने तयारी गरिएको छ।
महोत्सव सञ्चालनका लागि करिब २५ लाख २५ हजार रुपैयाँ खर्च हुने अनुमान गरिएको छ। स्टल भाडा, प्रायोजक तथा सहयोगमार्फत आर्थिक स्रोत जुटाइने महिला उद्योग विकास समितिकी महासचिव निर्मला जोशी श्रेष्ठले जानकारी दिनुभयो।
सुरक्षाका लागि प्रशासन र सुरक्षा निकायसँग समन्वय गरेर आवश्यक तयारी पूरा गरिएको छ। म्याग्दी उद्योग वाणिज्य संघ र स्थानीय तहको सहयोगमा महोत्सवलाई जिल्लाकै साझा कार्यक्रमका रूपमा आयोजना गरिएको हो।
