जलजला, पुष-२४, अमृत जोशी प्रतिष्ठानको आयोजनामा पर्वतको जलजला गाउँपालिका–२ गैराटोलस्थित समाजकल्याण प्राथमिक विद्यालयमा १९ औँ अमृत जोशी स्मृति दिवस विविध कार्यक्रमका साथ सम्पन्न भएको छ ।
स्मृति दिवसका अवसरमा समाजकल्याण प्राथमिक विद्यालयमा अध्ययनरत सम्पूर्ण विद्यार्थीहरूलाई न्यानो कपडा, झोला तथा स्टेशनरी सामग्री वितरण गरिएको थियो । साथै समाजमा विभिन्न क्षेत्रमा योगदान पुर्याएका व्यक्तिहरूलाई सम्मान समेत गरिएको थियो ।
कार्यक्रमका प्रमुख अतिथि अर्जुनप्रसाद जोशीले विद्यालयमा अमृत जोशी स्मृति अक्षय कोष स्थापना गर्दै ५० हजार रुपैयाँ सहयोग प्रदान गर्नुभएको छ । त्यस्तै कोषका अध्यक्ष गंगाधर तिवारीले विद्यालयका लागि २५ हजार १ सय रुपैयाँ सहयोग हस्तान्तरण गर्नुभएको छ ।
कार्यक्रममा शुभकामना मन्तव्य व्यक्त गर्दै समाजसेवी तथा अमृतप्रसाद जोशीका समकक्षी थलबहादुर घर्ति क्षेत्री र क्याप्टेन टेकबहादुर घर्ति क्षेत्रीले अमृत जोशीको योगदान स्मरण गर्दै यस्ता कार्यक्रमले शिक्षा र समाज रूपान्तरणमा सकारात्मक प्रभाव पार्ने बताउनुभयो ।
जलजला गाउँपालिकाका अध्यक्ष राजुप्रसाद आचार्यले मन्तव्य व्यक्त गर्दै प्रतिष्ठानको सामाजिक तथा शैक्षिक योगदानको प्रशंसा गर्नुभएको थियो । जलजला गाउँपालिका–२ का वडाध्यक्ष प्रकाशबहादुर घर्ति क्षेत्रीले समग्र शिक्षाको बिकासमा प्रतिष्ठानले पुर्याएको योगदानको कदर गर्नुभयो त्यसैगरी विद्यालयका प्रधानाध्यापक डम्बरबहादुर घर्ति क्षेत्री, साबिक माझफाँट गाविसका पूर्व अध्यक्ष रामबहादुर लामिछानेलगायतले मन्तब्य ब्यक्त गर्नुभएको थियो ।
प्रतिष्ठानका प्रमुख संरक्षक तथा संविधान सभा सदस्य अर्जुनप्रसाद जोशीको प्रमुख आतिथ्यतामा प्रतिष्ठानका अध्यक्ष गंगाधर तिवारीको अध्यक्षतामा सम्पन्न भएको कार्यक्रमको संचालन कार्यक्रममा प्रतिष्ठानका सदस्य खिमप्रसाद पौडेलले स्वागत मन्तव्य व्यक्त र सञ्चालन प्रतिष्ठानका सहसचिव आशिष जोशीले गर्नुभएको थियो ।
कार्यक्रमले विद्यार्थीको मनोबल अभिवृद्धि गर्नुका साथै समाजसेवामा प्रेरणा प्रदान गरेको सहभागीहरूको भनाइ थियो ।
