देवी जिसी/पुष-१९, म्याग्दी सदरमुकाम बेनीमा परम्परागत रूपमा लाग्दै आएको माघेसङ्क्रान्ति मेलाको निरन्तरताका लागि यस वर्ष ‘११ औँ माघे संक्रान्ति मेला, खाना महोत्सव तथा कृषि मेला’ आयोजना हुने भएको छ।
म्याग्दी उद्योग वाणिज्य संघअन्तर्गतको महिला उद्यम विकास समिति ले यही पुस ३० गतेदेखि माघ ३ गतेसम्म बेनीको खुल्ला मञ्चमा मेलाको आयोजना गर्न लागेको हो।
शनिवार बेनीमा आयोजित पत्रकार सम्मेलनमा महिला उद्यम विकास समितिकी सभापति अम्बिका श्रेष्ठ ले परम्परागत मेलाको जगेर्ना, स्थानीय कला-संस्कृतिको संरक्षण, महिला उद्यमीहरूको प्रोत्साहन र पर्यटन प्रवर्द्धनमा टेवा पुर्याउने उद्देश्यले मेला आयोजना गर्न लागिएको जानकारी दिनुभयो।
मेलामा जिल्लाभरका कृषि तथा पशुजन्य उत्पादनको प्रदर्शनीसँगै लघु तथा घरेलु उद्यमीहरूले उत्पादन गरेका स्थानीय सामग्रीहरूको खरिद-बिक्री समेत गरिने उहाँले बताउनुभयो।
मेलाका अवसरमा खुल्ला लोकनृत्य, खाना प्रतियोगिता, महिला उद्यमी उत्पादन प्रतियोगिता, दुनाटपरी तथा बाटेको धुप बनाउने, खुल्ला अन्धनिसान, लठो तान्ने, लठो तान्ने, छेलो लगायत परम्परागत खेलकुद प्रतियोगिताहरू सञ्चालन हुनेछन्।
त्यसैगरी, जिल्लाका पर्यटकीय स्थल झल्किने विद्यालयस्तरीय खुल्ला पेन्टिङ प्रतियोगिता पनि आयोजना गरिने समितिले जनाएको छ।
म्याग्दी उद्योग वाणिज्य संघका अध्यक्ष सुविन श्रेष्ठ ले मेलामा उच्च शिक्षा अध्ययनरत विद्यार्थीहरूका लागि उद्यमशील व्यवसायिक योजना प्रतियोगिता समेत समावेश गरिएको बताउनुभयो।
उहाँका अनुसार, मेलाले महिला उद्यमीहरूको नेतृत्व क्षमताको विकास गर्नुका साथै जिल्लामा लुकेर रहेका कला, प्रतिभा, मौलिक भेषभूषा तथा सांस्कृतिक पहिचानको प्रवर्द्धनमा समेत सहयोग पुर्याउनेछ। मेलाको उद्घाटनका दिन बेनी बजारमा विभिन्न जातजातिहरूले मौलिक कला-संस्कृति झल्काउने झाँकी प्रदर्शन गर्ने कार्यक्रम तय गरिएको छ।
मेलामा स्थानीय तथा राष्ट्रिय कलाकारहरूको सांगीतिक प्रस्तुति पनि रहनेछ। मेला स्थलमा कृषि ज्ञान केन्द्र, भेटेरीनरी अस्पताल तथा पशु सेवा विज्ञ केन्द्र सँगको सहकार्यमा रैथाने कृषि तथा पशुजन्य उत्पादनको विशेष प्रदर्शनी राखिने भएको छ।
मेलालाई सफल बनाउन विभिन्न उपसमिति गठन गरी तयारी तीव्र पारिएको समितिकी महासचिव प्रमिला जोशी श्रेष्ठ ले जानकारी दिनुभयो।
