बेनी, पुष-१४, नेपाली कम्युनिष्ट पार्टी (नेकपा) ले म्याग्दीमा आसन्न प्रतिनिधिसभा सदस्य निर्वाचनलाई लक्षित गर्दै गाउँ–गाउँ केन्द्रित चुनावी अभियान सुरु गरेको छ।
तत्कालीन नेकपा (माओवादी केन्द्र), नेकपा (एकीकृत समाजवादी) लगायत १६ वाम घटक मिलेर बनेको नेकपाले जनस्तरमा पार्टी एकताको सन्देश पुर्याउने उद्देश्यसहित सोमबार मंगला गाउँपालिका–३, खर्कबाट अभियानको औपचारिक सुरुआत गरेको हो।
पार्टीका नेता लालु किसानका अनुसार, अभियानले कार्यकर्तालाई समसामयिक राजनीतिक अवस्था, पार्टी नीति, योजना, तथा विगतमा सरकारमा रहँदा गरिएका जनपक्षीय कामबारे प्रशिक्षित गर्नेछ। साथै, नागरिकका गुनासा, सुझाव र अपेक्षा बुझेर नीति निर्माणमा सहयोग पुर्याउने लक्ष्य राखिएको छ।
आगामी फागुन २१ गते हुने निर्वाचनका लागि म्याग्दीबाट प्रत्यक्षतर्फ सिफारिस भएका सम्भावित उम्मेदवारहरू— अर्जुनबहादुर थापा, कृष्णकुमार विश्वकर्मा (कृष्ण GC), गमबहादुर श्रीसमगर, टेकबहादुर वि.क., र दुर्गा कार्की (बानियाँ) सहितको टोली गाउँ भेटघाटमा खटिएको छ।
केन्द्रीय सदस्य गोविन्द पौडेलले नागरिक समस्या नीति–मार्फत सम्बोधन गराउन सम्भावित उम्मेदवारलाई समेत अभियानमा सहभागी गराइएको स्पष्ट पार्नुभयो। उहाँका अनुसार, पार्टी ध्रुवीकरणले संविधान, उपलब्धि र जनआन्दोलनको मर्म रक्षा गर्दै नवयुवा पुस्ताका माग सम्बोधन गर्ने लक्ष्य राखेको छ।
उम्मेदवार सिफारिसमा परेका नेता अर्जुन थापाले विगतका राजनीतिक उपलब्धि बचाउँदै जेनजी आन्दोलनको भावनाअनुसार देशलाई निकास दिन नेकपाले आगामी चुनाव जित्नुपर्ने धारणा राख्नुभयो।
नेता रेशम जुग्जालीका अनुसार, नेकपाले सुशासन, राजनीतिक स्थिरताका लागि प्रत्यक्ष निर्वाचित कार्यकारी, भ्रष्टाचार छानबिनका लागि शक्तिशाली आयोग, र संवैधानिक निकायलाई राजनीतिक हस्तक्षेपमुक्त बनाउँदै योग्यता–आधारित अवसर प्रणाली विकासलाई मुख्य राजनीतिक मुद्दा बनाएको छ।
नेकपा मंगला गाउँ कमिटीका नेता कुलबहादुर पुनको अध्यक्षतामा सम्पन्न एकता सन्देश सभामा वामपन्थी वृद्ध नेता आयतु रोका लाई सम्मान गरिएको थियो। कार्यक्रमको स्वागत मन्तव्य शान्ति पुनले राख्नुभयो भने सञ्चालन मिलन रोकाले गर्नुभएको थियो।
