देवी जिसी सुबेदी/पुष-१२, म्याग्दीको बेनीमा सञ्चालित संगिनी बचत तथा ऋण सहकारी संस्था लिमिटेडको १३औँ वार्षिक साधारण सभा शनिबार सम्पन्न भएको छ।
साधारण सभाको अवसरमा संस्थाकी अध्यक्ष साधना कुमारी श्रेष्ठले संस्थागत तथा आर्थिक प्रतिवेदन प्रस्तुत गर्नुभएको थियो भने लेखा सुपरिवेक्षण समितिका संयोजक थमसरा पुनले वार्षिक लेखा प्रतिवेदन प्रस्तुत गर्नुभएको थियो।
कार्यक्रममा संस्थाले उत्कृष्ट कार्य गर्ने सेयर सदस्य तथा बचतकर्तालाई सम्मान गरेको छ। असल ऋणी पुतली देवी गर्बुजा, आवधिक बचतकर्ता मिना देवी रामजाली, नियमित बचतकर्ता कौसिला देवी घर्ती क्षेत्री तथा दैनिक बचतकर्ता उजेली थापा मगरलाई दोसल्ला ओढाई मायाको चिनो प्रदान गरी सम्मान गरिएको थियो।
त्यसैगरी, संस्थामा लामो समयदेखि कार्यरत कर्मचारी मनमाया थापा मगरलाई नगदसहित बिदाइ तथा सम्मान गरिएको छ।
महिलाहरूको नेतृत्वमा सञ्चालित यस सहकारी संस्थाको हाल सेयर पुँजी दुई करोड ३४ लाख ३३ हजार ३ सय रुपैयाँ, बचत दुई करोड ६२ लाख ५ हजार ९ सय ४८ रुपैयाँ र कर्जा लगानी तीन करोड ५७ लाख ६९ हजार ७ सय ८१ रुपैयाँ रहेको जानकारी दिइएको छ।
साधारण सभा संस्थाकी अध्यक्ष साधना कुमारी श्रेष्ठको अध्यक्षतामा सम्पन्न भएको हो। कार्यक्रममा उपाध्यक्ष गौरी थापाले स्वागत मन्तव्य व्यक्त गर्नुभएको थियो भने सचिव देवी जिसीले कार्यक्रम सञ्चालन गर्नुभएको थियो।
