जलजला, पुष-९, पर्बतको जलजला गाउँपालिका-३ स्थित विद्याज्योति माध्यमिक विद्यालय २०८१ सालको SEE परीक्षा मा सामुदायिक विद्यालयतर्फ सर्वउत्कृष्ट नतिजा सहित जिल्लामै पहिलो बनेको छ।
त्यसैगरी ग्राम प्रकाश माध्यमिक विद्यालय लेखफाट दोश्रो र जनकल्याण माध्यमिक विद्यालय नाग्लिबांग तेश्रो भएका छन् । जनकल्याण मावि नाग्लिबांग सामुदायिक विद्यालय तर्फ सत प्रतिशत विद्यार्थी उत्तीर्ण गराउन सफल जिल्लाको एक मात्र विद्यालय हो ।
नेपाल सरकार शिक्षा, विज्ञान तथा प्रविधि मन्त्रालय अन्तर्गतको शिक्षा विकास तथा समन्वय इकाई, पर्बत ले विद्यालयलाई मंगलबार उत्कृष्ट विश्लेषणसहित प्रथम घोषणा गर्दै सम्मान गरेको हो।
विषयगततर्फ पनि विद्यालयका शिक्षकहरूले जिल्लामै उत्कृष्ट नतिजा दिलाउन सफल भएका छन्। विज्ञान विषयमा मेख बहादुर भण्डारी, गणितमा यज्ञ बहादुर खत्री, र सामाजिकमा जीवन कार्की जिल्लामै प्रथम हुनुभएको छ।
उहाँहरूलाई शिक्षा समन्वय इकाईले खादा र प्रमाणपत्र सहित सम्मान गरेको छ।
निश्चित मापदण्डका आधारमा समेत विद्यालयले प्रथम स्थान हासिल गरेपछि, विद्यालयले विवेक सुवेदी पुण्य स्मृति शैक्षिक रनिंग शिल्ड पनि प्राप्त गरेको छ।
पर्वतको उत्तरी क्षेत्र जलजला गाउँ पालिकाका तिन विद्यालयले प्राप्त गरेको यो उपलब्धिले जलजलाको शैक्षिक गौरव थप उचाइमा पुगेको छ।
