बेनी, पुष-६, म्याग्दीको बेनी नगरपालिका–३ भकिम्लीमा अवस्थित स्वर्गाश्रममा आइतबार विश्व ध्यान दिवस विविध कार्यक्रमका साथ मनाइएको छ।
बेनी नगरपालिका वडा नम्बर ३ को कार्यालयको सहयोगमा नविन आनन्द योग केन्द्र नेपाल र स्वर्गाश्रम क्षेत्र विकास समितिको आयोजनामा समुद्री सतहदेखि करिब दुई हजार पाँच सय मिटर उचाइमा रहेको स्वर्गाश्रममा ध्यान दिवस मनाइएको हो।
दिवसको अवसरमा योग तथा ध्यानको नमुना प्रदर्शन, प्रवचन र सांस्कृतिक नृत्य प्रस्तुत गरिएको थियो। कार्यक्रमका लागि बेनी, गलेश्वर, तातोपानी, बाबियाचौर र दरवाङ क्षेत्रका योगी, साधक तथा स्थानीयबासीहरूको उल्लेखनीय सहभागिता रहेको थियो।
कार्यक्रमका प्रमुख अतिथि बद्रीनाथ स्वामीले ध्यानको सुरुवात नेपालमै भएको र अहिले यसले विश्वव्यापी रूप लिएको बताउनुभयो। हिमाली क्षेत्र योग र ध्यानका लागि उपयुक्त वातावरण भएको उल्लेख गर्दै उहाँले पौराणिक कालमा देवी–देवताहरूले पहाडी क्षेत्रमा ध्यान साधना गरेको विश्वास रहेको जानकारी दिनुभयो। योग र ध्यान आधुनिक जीवनका लागि आधारभूत आवश्यकता बन्दै गएको उहाँको भनाइ थियो।
त्यसैगरी स्वामी त्रिशक्तिनाथले स्वस्थ खानपान र सही संगतले मात्र मानिस स्वस्थ रहन सक्ने बताउनुभयो। गलत आहार, व्यवहार र संगतले मानव स्वास्थ्यमा नकारात्मक असर पार्ने उहाँको भनाइ थियो।
योगी जमुना आचार्यले योग अभ्यासपछि तनावबाट मुक्त भएको र शरीरको अनावश्यक तौल घटेको अनुभव सुनाउनुभयो। नविन आनन्द योग केन्द्र नेपालका हरिप्रसाद पौडेलले परापूर्वकालमा ऋषिमुनिहरूले तपस्या गरेर ज्ञान आर्जन गरेको स्वर्गाश्रमलाई आधुनिक समाजमा ध्यान केन्द्रका रूपमा विकास गर्न सकिने धारणा राख्नुभयो।
कार्यक्रममा योगी बलराम शर्माले योग र ध्यानसम्बन्धी रचना प्रस्तुत गर्नुभयो भने योग प्रशिक्षक नविन जुग्जालीले सहभागीहरूलाई योग अभ्यास गराउनुभएको थियो।
धौलागिरि र अन्नपूर्ण हिमशृङ्खलाको सम्मुखमा रहेको स्वर्गाश्रम धार्मिक तथा पर्यटकीय दृष्टिले अत्यन्तै सम्भावनायुक्त रहेको योगी कमलकुमारी पुनले बताउनुभयो।
बेनी नगरपालिका–३ का वडा अध्यक्ष पदम पुनका अनुसार आधारभूत पूर्वाधार तयार भइसकेको स्वर्गाश्रमलाई ध्यान केन्द्रका रूपमा प्रवर्द्धन गर्ने उद्देश्यले ध्यान दिवस आयोजना गरिएको हो। करिब दुई सय वर्ष पुरानो इतिहास बोकेको स्वर्गाश्रम ऋषिमुनिहरूले तपस्या गरी ज्ञान आर्जन गरेको स्थलका रूपमा परिचित छ।
स्वर्गाश्रम क्षेत्र विकास समितिका अध्यक्ष तथा वडा सदस्य रत्नबहादुर जिसीका अनुसार आश्रममा सडक, विद्युत र खानेपानीको सुविधा पुगेको छ। योगी तथा भक्तजनका लागि आश्रयस्थल, घेराबार, भान्छाकोठा र तीर्थालु बस्ने सत्तलसमेत निर्माण गरिएको छ।
आश्रममा १२ वर्षसम्म तपस्या गर्नुभएकी इन्दिरा माताको नेतृत्व र स्थानीयको पहलमा केही वर्षअघि सञ्चालित महायज्ञबाट संकलित दान तथा बेनी नगरपालिकाको सहयोगमा गणेश मन्दिर, पानी जम्मा गर्ने कुवा र आश्रम भवन निर्माण गरिएको हो।
स्वर्गाश्रमको दर्शन गरेमा अन्य पाँच पवित्र तीर्थस्थलको दर्शन बराबर पुण्य प्राप्त हुने तथा मनोकामना पूरा हुने जनविश्वास रहेको छ। यहाँबाट मनोरम हिमशृङ्खला, बेनी बजार र वरपरका दर्जनौँ गाउँबस्तीको दृश्य अवलोकन गर्न सकिन्छ।
स्वर्गाश्रममा हरेक वर्ष वैशाख १ गते रथयात्रा आयोजना गरिन्छ। स्वर्गाश्रमदेखि करिब ४० मिनेट पैदल दूरीमा रहेको बेलढुङ्गा क्षेत्रलाई पनि एकीकृत रूपमा धार्मिक तथा पर्यटकीय गन्तव्यका रूपमा विकास गर्न स्थानीयबासीहरूले पहल गरिरहेका छन्।
भकिम्लीको मुसुङ र बागलुङको काठेखोला गाउँपालिकाको ओखलेको सिमानामा रहेको बेलढुङ्गा प्राकृतिक भ्युटावरका रूपमा नयाँ गन्तव्य बन्ने अपेक्षा गरिएको छ।
