म्याग्दी, पुष-५, रघुगङ्गा गाउँपालिका–७ चिमखोलामा अवस्थित पर्यटकीयस्थल सोवाङ धुरीमा आश्रयस्थल निर्माण भएपछि अब पर्यटक र पाहुनाले ओडारमा रात काट्नुपर्ने बाध्यता हटेको छ ।
चिमखोलाका तारा गर्बुजा पुन, लोकिन पुन, गोपिन पुन र हिरे पुनले काठ र जस्तापाटाको प्रयोग गरी समुन्द्री सतहदेखि ३ हजार ८ सय ४० मिटर उचाइमा २० जना क्षमताको आश्रयस्थल निर्माण गर्नुभएको हो । सोवाङ धुरी घुम्न जाने पाहुनालाई सुरक्षित बासको सुविधा दिन आश्रयस्थल बनाइएको तारा गर्बुजा पुनले बताउनुभयो ।
उहाँका अनुसार तत्काललाई आश्रयस्थल प्रयोगमा ल्याइने र दीर्घकालीन रूपमा त्यहीँ रेष्टुरेन्ट सञ्चालन गर्ने विषयमा वडा कार्यालयसँग सहमति भइसकेको छ । साथै, सोवाङ धुरीबाट प्याराग्लाइडिङ परीक्षणको तयारी पनि भइरहेको छ ।
म्याग्दी र मुस्ताङ जोड्ने धौलागिरि आइसफल पदमार्गमा पर्ने सोवाङ धुरीबाट संसारको सातौँ अग्लो हिमाल धवलागिरिको फेददेखि चुचुरोसम्मको दृश्य अवलोकन गर्न सकिन्छ । यहाँबाट सूर्योदयसँगै धवलागिरि, अन्नपूर्ण, नीलगिरि, मानापाथी, टुकुचे, माछापुच्छे र मनास्लु हिमशृङ्खलाको मनोरम दृश्य देख्न सकिन्छ ।
पदमार्ग आसपासको जङ्गलमा घोरल, मृगलगायत वन्यजन्तु तथा पाँचऔँले र सेदक चिनी जस्ता जडीबुटी पनि पाइन्छन् । चिमखोलादेखि एक दिनमै, विस्तारै हिँड्दा दुई दिनमा सोवाङ धुरी पुग्न सकिन्छ ।
नयाँ पहिचान भएको पदमार्ग र पर्यटकीय गन्तव्यको प्रवर्द्धनका लागि दृश्यावलोकन केन्द्र स्थापना गरिएको छ । पानी संकलनका लागि ड्रम राखिएको छ भने सार्वजनिक शौचालय पनि निर्माण भइसकेको छ । तर, होटल र रेष्टुरेन्ट नभएकाले आवश्यक बन्दोबस्तीका सामग्रीसहित जानुपर्ने स्थानीयको भनाइ छ ।
यससँगै सोवाङ धुरी म्याग्दी जिल्लाको नयाँ सम्भावनायुक्त पर्यटकीय गन्तव्यका रूपमा स्थापित हुँदै गएको छ ।
