बेनी, मंगसिर-२९,
म्याग्दी जिल्लाका साहित्यकार अजयमिलन श्रेष्ठ ‘डिल्लीराधा पुरस्कार’द्वारा सम्मानित हुनुभएको छ। कुश्मा बजारस्थित पर्वत साहित्य सङ्गमले स्थापना तथा व्यवस्थापन गरेका विभिन्न पुरस्कारहरू अन्तर्गत धौलागिरि क्षेत्रका साहित्यकार तथा कला सर्जकहरूलाई दुई वर्षको अन्तरालमा सम्मान गर्ने क्रममा श्रेष्ठलाई उक्त पुरस्कार प्रदान गरिएको हो।
नेपाली भाषा, साहित्य, कला र शिक्षा क्षेत्रमा पुर्याएको अतुलनीय योगदानको कदर गर्दै आयोजित कार्यक्रममा अजयमिलन श्रेष्ठसँगै राजेन्द्र पहाडी, मोहनबहादुर मल्ल साहित्य प्रतिष्ठान, गोविन्दप्रसाद भुसाल, सरस्वती शर्मा ‘जिज्ञासु’, लक्ष्मीप्रसाद शर्मा पौडेल, जगन्नाथप्रसाद लम्साल, मछिन्द्रप्रसाद शाक्य र सुशील थकालीलाई पनि सम्मान गरिएको छ।
अजय मिलन श्रेष्ठ म्याग्दी जिल्लाका सक्रिय र समर्पित साहित्यकार हुनुहुन्छ। नेपाली भाषा, साहित्य, कला र शिक्षा क्षेत्रमा निरन्तर योगदान पुर्याउँदै आउनुभएका उहाँ धौलागिरि क्षेत्रको साहित्यिक पहिचान सुदृढ गर्ने सर्जकका रूपमा चिनिनुहुन्छ।
उहाँका सिर्जनामा सामाजिक यथार्थ, मानवीय संवेदना, ग्रामीण जीवन र सांस्कृतिक चेतनाको सशक्त अभिव्यक्ति पाइन्छ। सरल तर भाव गम्भीर शैली उहाँको लेखनको विशेषता हो। साहित्यिक सिर्जनासँगै साहित्यिक अभियान, कार्यक्रम र सर्जकहरूको प्रोत्साहनमा पनि उहाँ निकै सक्रिय हुनु हुन्छ।
