बेनी, मंगसिर-२९, म्याग्दी सदरमुकाम बेनीमा रहेको बेनी बचत तथा ऋण सहकारी संस्थाको २४औँ वार्षिक साधारण सभा तथा २५औँ स्थापना दिवस आइतबार सम्पन्न भएको छ। संस्थाले २५ औँ स्थापना दिवस तथा २४ औँ बार्षिक साधारणसभाको अवसरमा आइतवार संस्थाले बेनी नगरपालिका– ९ गलेश्वरमा अवस्थित ज्येष्ठ नागरिक आश्रमलाई रु ३० हजार एक सय आर्थिक सहयोग गरेको छ ।
साधारण सभाको उद्घाटन गर्दै सहकारीका निवर्तमान अध्यक्ष रमेश गिरीले छरिएर रहेको पुँजीलाई एकीकृत गरी उद्यमशीलता प्रवर्द्धन र रोजगारी सिर्जनामा सहकारीको भूमिका महत्वपूर्ण रहेको बताउनुभयो। सहकारी क्षेत्रमा विभिन्न प्रश्न उठिरहेको वर्तमान अवस्थामा पनि सहकारीका सिद्धान्तलाई आत्मसात् गरेकै कारण बेनी बचतले राम्रो प्रगति हासिल गर्न सफल भएको उहाँको भनाइ थियो।
साधारण सभामा अध्यक्ष सञ्जयकुमार श्रेष्ठले वार्षिक प्रतिवेदन, लेखा सुपरिवेक्षण समितिका संयोजक शिवप्रसाद कटुवाल क्षेत्रीले लेखा प्रतिवेदन तथा कोषाध्यक्ष कमलप्रसाद श्रेष्ठले आय–व्यय विवरण प्रस्तुत गर्नुभएको थियो।
आर्थिक वर्ष २०८१/०८२ मा सहकारीले ४१ करोड १९ लाख रुपैयाँ बचत संकलन, ३६ करोड २० लाख रुपैयाँ ऋण लगानी तथा ७० लाख ५४ हजार रुपैयाँ मुनाफा गरेको जानकारी दिइएको छ।
कार्यक्रममा ७५ वर्ष उमेर पुगेका ९ जना ज्येष्ठ शेयर सदस्यलाई ‘बेनी बचत आजीवन सहारा’ कार्यक्रम अन्तर्गत जनही ६ हजार रुपैयाँ नगदसहित सम्मान गरिएको थियो। त्यस्तै उत्कृष्ट कारोबारकर्ता व्यक्तिगततर्फ माधवप्रसाद रेग्मी, संस्थागततर्फ बेनी खानेपानी उपभोक्ता संस्था, ज्येष्ठ नागरिक दयासागर शर्मा, उत्कृष्ट कर्मचारीका रूपमा प्रवन्धक सज्जन चौधरी तथा स्थापनादेखि हालसम्मका प्रवन्धकहरूलाई सम्मान गरिएको थियो।
साधारण सभा सम्पन्न भएपछि सहकारीले सामाजिक उत्तरदायित्व अन्तर्गत बेनी नगरपालिका–९ गलेश्वरमा अवस्थित गलेश्वरधाम ज्येष्ठ नागरिक आश्रमलाई ३० हजार १ सय रुपैयाँ आर्थिक सहयोग प्रदान गरेको छ।
सहकारीका अध्यक्ष सञ्जयकुमार श्रेष्ठ र निवर्तमान अध्यक्ष रमेश गिरीले आश्रमका अध्यक्ष बमबहादुर पुनलाई सहयोग रकम हस्तान्तरण गर्नुभएको थियो। सहकारीले बचत तथा ऋण कारोबारसँगै सामाजिक जिम्मेवारी पनि बहन गर्दै आएको अध्यक्ष श्रेष्ठले बताउनुभयो।
गलेश्वरधाम ज्येष्ठ नागरिक आश्रममा हाल ४३ जना ज्येष्ठ नागरिक बसोबास गर्दै आएका छन्। आश्रम सञ्चालनमा सहयोग पुर्याएको भन्दै आश्रमका अध्यक्ष पुनले सहकारीप्रति आभार व्यक्त गर्नुभएको छ।
कार्यक्रम सहकारीका उपाध्यक्ष माधवप्रसाद रेग्मीको स्वागत मन्तव्य तथा सचिव चन्द्रबहादुर घिमिरेको सञ्चालनमा सम्पन्न भएको थियो।
