म्याग्दीको मुनामा बाल कचहरी, १० बुँदे प्रतिबद्धता

बेनी, मङ्सिर-२९,  म्याग्दीको धवलागिरी गाउँपालिका–३, मुनामा आइतबार सम्पन्न पालिका स्तरीय बाल कचहरीबाट बालअधिकारको सुनिश्चितता, संरक्षण र प्रवर्द्धन तथा बालविवाह न्यूनीकरणका लागि १० बुँदे घोषणापत्र जारी गरिएको छ।

बाल क्लबका प्रतिनिधि, जनप्रतिनिधि, शिक्षक, विभिन्न संघसंस्था तथा सरोकारवालाबीच धवलागिरी गाउँपालिकामा रहेका बालबालिका सम्बन्धी समस्या र समाधानका उपायबारे छलफल गर्दै घोषणापत्र जारी गरिएको हो।

घोषणापत्रमा बालविवाह, विभेद र बाल मजदुरीजस्ता सामाजिक कुसंस्कारविरुद्ध सामूहिक आवाज उठाउने, त्यस्ता घटनाको न्यूनीकरणमा प्रतिबद्ध भएर लाग्ने तथा बालबालिकाको बाँच्न पाउने, संरक्षण, विकास र सहभागिताको अधिकारको कार्यान्वयनमा संवेदनशील रहने उल्लेख गरिएको छ।

त्यसैगरी विद्यालयमा बालमैत्री वातावरण र भौतिक संरचना निर्माण गर्ने, सरकारले उपलब्ध गराउने सेनेटरी प्याडको गुणस्तरमा ध्यान दिने, बालविवाह गर्ने र गराउनेलाई कानुनी दायरामा ल्याउने, गुणस्तरीय शिक्षा सुनिश्चित गर्ने तथा बालबालिकामा अन्तर्निहित प्रतिभा प्रस्फुटनका अवसर सिर्जना गर्ने प्रतिबद्धता जनाइएको छ।

घोषणापत्रमा विद्यालयको दिवा खाजालाई पोषणयुक्त र आत्मनिर्भर बनाउन विद्यालयमै करेसाबारी स्थापना गर्ने तथा विद्यालय र समुदायमा हुने सबै किसिमका विभेदविरुद्ध शून्य सहनशीलताको नीति अपनाइने उल्लेख छ।

गाउँकार्यपालिकाको सामाजिक विकास समितिका संयोजक तथा वडा नम्बर ३ का अध्यक्ष देवेन्द्र रोकाको अध्यक्षतामा भएको कार्यक्रममा गाउँपालिकाका उपाध्यक्ष रेशम पुनमगरले बालअधिकार संरक्षण र बालविवाह न्यूनीकरणमा गाउँपालिकाले विशेष जोड दिएको बताउनुभयो। उहाँले दिवा खाजा र छात्रावासका लागि आवश्यक तरकारी विद्यालयमै उत्पादन गर्ने अभ्यास सुरु भएको जानकारी दिनुभयो।

कार्यक्रममा धवलागिरी मावि मुना, बुद्धि विकास मावि मुदी, लमसुङ, हेम नमुना आवासीय मावि र ताकम माविका विद्यार्थीहरूले जनप्रतिनिधि तथा सरोकारवालासँग बालअधिकार, बालविवाह न्यूनीकरण, विपन्न विद्यार्थीको शिक्षामा पहुँच र शैक्षिक गुणस्तरका विषयमा जिज्ञासा राखेका थिए।

उक्त जिज्ञासाको जवाफ गाउँपालिकाका उपाध्यक्ष रेशम पुन, सामाजिक विकास समिति संयोजक देवेन्द्र रोका, प्रमुख प्रशासकीय अधिकृत विष्णुप्रसाद शर्मा, स्वास्थ्य शाखा प्रमुख सम्झना खाती, शिक्षा शाखा प्रमुख ख्यामराज सुवेदी, महिला बालबालिका शाखाकी पुष्पा दवाडी र ताकम प्रहरी चौकीका प्रमुख विक्रम तिवारीले दिनुभएको थियो।

गुड नेवर्स इन्टरनेशनलको आर्थिक तथा प्राविधिक सहयोगमा संगम म्याग्दीद्धारा सञ्चालित एकीकृत विकास परियोजनाको आयोजनामा भएको कार्यक्रममा रामबहादुर रावतले बालअधिकारको अवस्था, चुनौती र आवश्यकताबारे सहजीकरण गर्नुभएको थियो। कार्यक्रममा गुड नेवर्स इन्टरनेशनल पर्वत क्लस्टरका संयोजक रञ्जीतकुमार चौधरीले स्वागत मन्तव्य राख्नुभएको थियो।

संगम म्याग्दीले सन् २०१३ देखि धवलागिरी गाउँपालिकामा एकीकृत विकास परियोजना सञ्चालन गर्दै आएको र गल्र्स फर्स्ट फण्डको सहयोगमा बालविवाह न्यूनीकरण सम्बन्धी छुट्टै कार्यक्रम पनि सञ्चालन भइरहेको जानकारी दिइएको छ।