म्याग्दी, मङ्सिर-२८, बेनीमा शुक्रबार सम्पन्न प्रतियोगितामा बेनी नगरपालिकाले २५ स्वर्ण, १४ रजत र ६ काँस्य गरी जम्मा ४५ पदक प्राप्त गर्दै रनिङ शिल्ड आफ्नो पोल्टामा पारेको हो।
त्यसैगरी, अन्नपूर्ण गाउँपालिकाले ८ स्वर्ण, ५ रजत र ३ काँस्यसहित कुल १६ पदक जित्दै दोस्रो स्थान हासिल गरेको छ भने ६ स्वर्ण, १२ रजत र १० काँस्य पदकसहित रघुगंगा गाउँपालिका तेस्रो स्थानमा रहन सफल भएको छ।
जिल्ला खेलकुद विकास समिति म्याग्दीको आयोजनामा सम्पन्न प्रतियोगितामा जिल्लाका एक नगरपालिका र पाँच गाउँपालिकाबाट छनोट भएका करिब ४ सय छात्र–छात्राहरूले सहभागिता जनाएका थिए।
छात्र तथा छात्रा तर्फ भलिबल, कबड्डी र एथलेटिक्सका विभिन्न विधामा प्रतिस्पर्धा गराइएको प्रतियोगितामा कुल ४२ स्वर्ण पदकका लागि खेल सञ्चालन गरिएको जिल्ला खेलकुद विकास समिति म्याग्दीका अध्यक्ष सुमन श्रेष्ठले जानकारी दिनुभयो।
प्रतियोगिताका विजेता पालिकाहरूलाई विघटित प्रतिनिधि सभा सदस्य खमबहादुर गर्वुजाले नगद पुरस्कारसहित रनिङ शिल्ड, ट्रफी, मेडल तथा प्रमाणपत्र प्रदान गर्नुभएको थियो। जसअनुसार प्रथम हुनेलाई नगद २० हजार, दोस्रो हुनेलाई १५ हजार र तेस्रो हुनेलाई १० हजार रुपैयाँ प्रदान गरिएको छ। यस भन्दा अघिल्लो (१० औं) जिल्ला स्तरीय राष्ट्रपति कप रघुगंगा गाउँ पालिकाले जितेको थियो ।
